Clark/Heinecke/Wierer: Celebrations at The Funeral of Capitalism

Pob oedran | 2awr 15 mun | Saesneg, Almaeneg

Dyma gyhoeddi marwolaeth Cyfalafiaeth, a fu farw’n dawel ar ôl salwch hir.  

Rydyn ni’n eich gwahodd chi i ddathlu diwedd y system economaidd a chymdeithasol ymrannol. Nawr, mae’n bryd ffarwelio, a chynllunio ar gyfer dyfodol newydd, i ni, i genedlaethau’r dyfodol, ac i’r blaned. Byd heb ecsbloetio pobl, heb dwf economaidd parhaus ar draul byd natur. 

Gan ofyn y cwestiwn “sut ydyn ni eisiau byw?”, mae Dathlu yn Angladd Cyfalafiaeth yn cyfuno celf, theatr, dawns a cherddoriaeth hefyd, mewn defod fyfyriol derfynol sy’n troi’n barti ac yn bryd bwyd cymunedol.*  

 *Mae’r perfformiad yma’n cynnwys bwffe o fwyd lleol sy’n creu cyfle i ni rannu amser gyda’n gilydd, siarad gyda’n gilydd, a bod gyda’n gilydd. Bydd bwydlen lawn ar gael cyn y perfformiad gyda rhestr o’r cynnwys. 

___

Ynglun â'r artistiaid

Dathlu yn Angladd Cyfalafiaeth/Feierlichkeiten zur Beerdigung des Kapitalismus yw’r ail gywaith rhwng Laura Heinecke a Gareth Clark. Datblygodd partneriaeth Heinecke a Clark drwy archwiliad o rôl yr artist yn ystod cyfyngiadau’r pandemig.  

Wrth ddatblygu’r sioe newydd yma, maen nhw wedi ymuno â Carla Wierer a chasgleb o lunwyr theatr, cerddorion ac artistiaid i archwilio elfennau defod mewn ymgais i greu digwyddiad modern sy’n croesawu gobeithion creadigol a gweledigaeth y tîm amryddawn.   

Mae’r gasgleb newydd yma’n gweithio tuag at greu digwyddiad sy’n fframio taith pedwar perfformiwr wrth iddyn nhw archwilio galar, gadael fynd, dathlu, a chreu lle i lunio cynlluniau newydd. Bydd y gynulleidfa’n dilyn llwybr drwy dri gofod wrth i’r noson ddatblygu’n wledd. 

Llun: Tanja Wehling

___

TRAFODAETH ALW HEIBIO GYDA PHANED A CHACEN AM DDIM ✳️
Dydd Iau 24 Hydref, 2-5PM a nos Iau 28 Tachwedd 5-7PM
Ystafell Peilot (Llawr Cyntaf)

Mae Gareth Clark yn eich gwahodd chi i rannu eich safbwyntiau a’ch syniadau wrth iddo archwilio themâu canolog o gwmpas ei berfformiad newydd. Gan rannu rhywfaint o’r gwaith meddwl tu ôl i’r cynhyrchiad, bydd Gareth yn cynnal gofod i feddwl ar y cyd am sut rydyn ni’n symud ymlaen, yn gadael fynd, ac yn meddwl am fyw’n wahanol — a hynny gyda choffi, te a chacen am ddim.

Bydd y sesiynau yma’n archwilio’r canlynol:

1. Cyfalafiaeth – Beth yw hyn? Beth mae’n ei olygu i chi?
2. Colled – hunanfyfyrio. Sut ydyn ni’n dysgu gadael fynd?
3. Dathliad - Digwyddiadau bywyd? Hen ffyrdd a ffyrdd newydd o ddathlu?
4. Beth nesaf? – Sut hoffen ni fyw?

Gwneuthurwr theatr o Gymru yw Gareth Clark, y mae ei waith yn cofleidio heriau dynoliaeth drwy gwestiynu’r ffordd rydyn ni’n byw ac yn cael ein llywodraethu. Mae’n aelod sefydlu o Das Clarks (Mr a Mrs Clark) ac mae’n parhau i gynhyrchu prosiectau newydd yn greadigol i’r cwmni.