All of Us Strangers (15)

Sgriptiwr sy’n byw yn Llundain yw Adam (Andrew Scott). Mae’n dechrau cyfeillgarwch anesmwyth gyda’i gymydog dirgel Harry (Paul Mescal), sy’n bygwth troi’n rhywbeth mwy clòs. Ar yr un pryd, wrth ymweld â’i hen gartref teuluol, mae’n darganfod rhywbeth od a hyfryd, sy’n parhau i ddod yn ôl ato dro ar ôl tro. Ond wrth i’r dyddiau fynd yn eu blaenau, mae Adam yn dechrau cwestiynu’r cyfeiriad mae ei fywyd wedi mynd iddo, ac a yw hynny’n peri anfantais iddo.

Mae perfformiad canolog Andrew Scott unwaith eto’n dangos pam ei fod yn cael ei ystyried fel un o’n hactorion gorau. Mae Paul Mescal yn aruchel fel Harry, tra bod perfformiadau Jamie Bell a Claire Foy yn tanio rhai o nodau emosiynol mwyaf trawiadol y ffilm. Mae sgript Andrew Haigh yn taflu ymdeimlad ysgafn o ddrwgargoel dros y cyfan, ac mae ei bortread archwiliadol o berthnasau yr union beth rydyn ni wedi dod i’w ddisgwyl gan sgriptiwr-gyfarwyddwr rhagorol Weekend a 45 Years.